Suenter ina buna cuorsa a Lenzerheide sun jeu vegnius encunauras. Jeu hai stuiu desister dalla partenza alla cuppa mundiala a Nove Meso ils 11 da schaner. Buca ina sempla decisiun cun quei ch`ils criteris per la selecziun als giugs olimpics eran aunc buca adempli. Entgins dis hai jeu stuiu reduzir il trenament e mirar da puspei vegnir en fuorma. 

Ils 18 da schaner sun jeu lu partius al sprint ella tecnica libra en Pologna. Las cundiziuns da neiv eran bu mo schliatas mobein miserablas. Cun sgarar ensemen la davosa neiv ord ils uauls eis ei reussiu da menar atras la cuorsa. 14avrel dil prolog ei in stupent resultat. La cuorsa um encunter um ei denton buca gartegiada sco giavischau. Suenter la cupitgada cun in currider dalla Russia ha ei buca tunschiu per sequalificar per il miez final. Cun dus fests ruts e bottas dapertut sun jeu vegnius sco 6avel ell`arrivada. Ina legra fotografia e quater puncts dalla cuppa mundiala ei il sulet che ha mirau ora quei di. Ina trumpada che ha entgins dis schau dubitar vid ina partizipaziun als giugs olimpics. Cun il 27avel resultat era la qualificaziun per Sochi numnadamein buca segira. Vinavon han auters curriders Svizzers muossau quella fin d`jamna ina buna prestaziun;  Martin Jäger 5avel e Jovian Hediger 12avel. Suenter la cuorsa ha ei giu num spitgar sin la decisiun. Ils dis han pariu liungs. Sis sprinters sgolan ils 6 da fevrer a Sochi. Quater curriders san partir al sprint. Dus plazs ein gia occupai, dus plazs ein aunc libers. Per quels dus plazs fagein nus ora denter quater curriders ils 8 da fevrer sin il percuors dall`olimpiada. Jeu vegn a dar tut! 


Sochi schai sin 1500 meters sur mar. El mument sun jeu a Tavau per s'adaptar a quell`altezia. Avon Sochi partel jeu alla cuppa mundiala a Toblach ils 2 da fevrer 2014.